既然大家都對排毒瘦身有興趣，今次就從飲食方面同大家分享下啦！好乖既我完成一百日坐月生涯之後，見到咁肥美既自己，我決定戒晒所有零食，包括百力支、薯片、朱古力、糖果等等.......再戒埋佢哋既好朋友～紙包飲品同汽水，包括我最愛嘅檸檬茶！點戒？只要記住一包檸檬茶有7.5粒方糖，汽水仲多！你仲想唔想飲先😎？
（網絡圖片來源）
所以我多數都係飲水同埋烏龍茶。😇而飯量方面，我就開始慢慢將原本差唔多餐餐食兩碗既份量減少至食半碗，主打飲上奶嘅湯水，當中尤其以蕃茄豆腐魚湯為我嘅最愛！蕃茄好處多，除咗抗癌同預防心臟病之外對皮膚亦都好好，可以美白兼抗氧化，豆腐含有豐富蛋白質同鈣質，美肌抗衰老，清熱解毒同時預防心血管疾病，至於魚湯，由細到大都係我嘅最愛，鍾意佢夠晒鮮甜，美容又養顏！所以呢個組合係百喝不厭既😎
講到減肥永遠都離唔開排毒，其實人體係經常都會有毒素積聚，而經由大腸排出既毒素比例就高達75％，其次係尿液佔20％，汗水佔3％，毛髮同指甲各佔1％。現代人飲食缺乏纖維素又少食蔬果，再加上少運動，消化食物最少80個鐘頭，再諗下每次便便嘅份量同飲食嘅份量係咪成正比呢？冇出到嚟嘅就會喺體內變成廢物，會長期黏係我哋嘅腸壁上難以排出，日積月累就成為毒素，即係俗稱嘅宿便，正常人體內有3~6㎏的宿便，肥胖、便秘者體內則有7~11㎏的宿便。而宿便都會為我地帶來便秘，大肚腩，肥胖，皮膚粗糙暗啞，有口氣，痔瘡，易皮倦，高血壓等等既問題，對我哋嘅身體產生好大嘅危害架。
所以要減肥減肚腩就一定要正視排毒，所以好多時午飯或者老公唔返屋企食晚飯嘅時候我都會食排毒餐，即係菜+紫薯+粟米就當一餐，因為呢三樣嘢都係高纖而且可以幫助腸道蠕動，對排毒清宿便有一定嘅幫助。
沒有留言:
張貼留言