2016年10月24日 星期一

Philips AVENT 「 準爸爸變身準媽媽?!」活動分享

多謝Philips AVENT 邀請我同仔仔一同出席「 準爸爸變身準媽媽?!」嘅活動,當時大緊肚既我,而家BB都已經出世啦,回顧返當日係我第一次帶大仔一齊出席呢類型嘅活動,好彩佢都乖乖地陪我冇扭計!抵鍚!
活動一開始嘅時候見到台上面由胡諾言帶著一班準爸爸著起個假嘅巨肚, 而一班準媽媽們就坐係佢哋後邊睇住爸爸們扮演日常生活中,大肚媽媽會遇到嘅一啲動作,


 例如起床一個看似好簡單嘅事,但係懷孕期間因為個肚越來越大,難度亦會增加,需要則則身落床,正好可以俾爸爸們感受一下點解準媽媽動作會慢咗咁多, 
 之後嘅環節就係示範執拾地上嘅物品,呢個我個人覺得最困難,因為我經常都唔小心整跌啲嘢落地下,要靠自己執返真係唔容易架,始終個肚頂住咗,

 到最後換衫同埋着鞋嗰部份真係笑到肚痛,好多爸爸仲要媽媽題水先至可以完成呢個任務添,就我自己黎講,自從懷孕之後我已經冇着要綁帶嘅鞋啦!多數都係着平底鞋,一穿入去就走得,夠晒方便!


 成個活動真係非常搞笑,連仔仔都忍唔住問我點解啲爸爸個肚入面有BB,當然除咗搞笑之外個活動又可以教到準爸爸做以上動作正確嘅姿勢, 最重要係令一班準爸爸親身感受到當身懷巨肚嘅時候,做起各樣野上嚟真係好唔方便同埋比較吃力,從而更加體諒準媽媽陀B真係好偉大。所以我真心覺得呢個活動真係非常之有意義,好可惜老公當日要返工,否則我一定捉埋佢一齊上台感受下!期望下次嘅BB展再有同類形嘅活動我可以帶埋老公一齊去參加啦! 

以下係活動嘅精華片段,大家一齊欣賞下啦!