盡享親子之樂的staycation 體驗-馬灣挪亞方舟度假酒店

 趁着新年前嘅假期，我哋一家四口決定嚟個staycation 放鬆一下！所以我哋目標都係搵一啲適合親子嘅酒店，今次見到遠離繁囂嘅馬灣挪亞方舟度假酒店有好多唔同主題嘅特色酒店房套票，仲包埋免費晚餐、早餐同埋親子工作坊，啱晒小朋友呀！

其實入嚟馬灣都好方便，我哋搭東涌線去到青衣站C出口就有巴士可以直接去到馬灣沙灘廣場，落車之後沿扶手電梯指示就可以去到挪亞方舟酒店嘅沙灘閘口，同閘口嘅保安員講返當日登記入住姓名就可以進入酒店大堂check-in啦！

登登登登！今次我哋揀小朋友最愛嘅「叢林動物派對房」床單被鋪全部都係動物主題嘅佈置仲，有個小帳幕同埋小兒童枱櫈，全部都有動物主題，好得意呀❤️

估唔到間房都幾大，實現咗我有兩個洗手間既夢想😆仲有餐枱書枱同埋大露台，可以俾小朋友盡情奔跑放電，大人又可以做吓伸展運動呼吸吓新鮮空氣！

我哋今次既套票係可以免費參加「啤啤熊之友」製作室，親手製作獨一無二、趣緻又可愛既啤啤熊乙隻㗎！

物料可以喺呢四款裏邊揀一款，然後用佢哋嘅電動棉花機填充棉花、最後親手縫好就大功告成啦！

現場仲有好多得意嘅啤啤熊服飾可以自費購買，我哋一致決定揀咗可愛嘅水手裝！

整完啤啤熊之後我哋喺酒店戶外地方玩咗一陣、打下卡，轉眼又黎到晚餐時間啦！

補充一下資料，由於疫情受政府限聚令影響，我我哋入住期間晚市堂食為房間餐飲服務，所以check in時Front Desk 同事會提供pre order 紙去揀選套票裏面包含嘅豐富晚餐菜式及確定房間送餐時間（可選: 晚上6:00，6:30，7:00 ）

時間啱啱好，一返到酒店房間，職員已經為我哋送上豐富嘅6道精選「海陸盛滙精品晚餐」（適用於在星期五、六及公眾假期及假日前夕入住的旅客）真係豐富到不得了！準備來玩嘅朋友記得留意番入住日子啦！😍

先來有暖笠笠又香濃既龍蝦湯，仲有煎鴨肝配黑醋醬，鵝肝外脆內軟好誘惑，再加上酸酸甜甜嘅黑醋夠晒開胃，配埋脆卜卜嘅多士，實在太正啦！

凍海鮮盤都好豐富

開邊龍蝦啖啖肉又多膏而且海水味重、小白蝦、青口、扇貝都好新鮮！

仲有雜錦刺身拼盤，件件都好厚切！配埋日式豉油同埋Wasabi成個感覺真係猶如置身酒店餐廳享用緊自助餐一樣咁豐富！

主菜方面我揀咗胡椒香料煎牛肉眼配雜菌及洋葱醬（5成熟），牛肉好嫩滑好似小牛排一樣，連配菜都好好味😋

老公揀咗慢煮雞胸配松露忌廉及時令蔬菜，雞胸都煮得好Juice，配埋佢哋嘅松露忌廉汁都好特別！

兒童餐都好豐富，我哋揀咗肉醬意粉同埋芝士尖通粉，小朋友都好鍾意食呀！

最後仲有豐富嘅甜品

紅桑子玫瑰蛋糕

沒理牛奶朱古力蛋糕

抹茶奶凍

焦糖千層餅

榛子朱古力忌廉泡芙

甜品都好用心製作，全部都好有水準呀！

食飽飽本來想出去欣賞下美麗嘅青馬大橋夜景，但係小朋友話想留喺呢間咁靚嘅房到同爸爸媽媽一齊玩桌上遊戲！好啦！小朋友高興就好，反正套票都包咗免費享用酒店大堂遊戲設施及免費借用桌上遊戲❤️

第二朝一早就被小鳥動聽嘅歌聲同埋溫暖嘅陽光喚醒咗一向懶瞓我😝

即刻把握呢個黃金時間好好享用埋景觀優美嘅露台嚟做下晨操拉下筋！爽呀！

小朋友起床之後，我哋就一齊出發去挪亞方舟度假酒店豐盛閣享受自助既「假日任食經典早餐」

款式真係好多選擇，中式靚粥同豉油王炒麵、日式麵豉湯烏冬、西式黑松露炒蛋、茄汁豆、炸魚柳，滿足不同口味需要。

餐廳風景都好靚可以一邊欣賞青馬大橋及汀九橋既美景，一邊享用豐富嘅早餐！

食完早餐之後見到原來旁邊有個自費既Art Jamming 工作坊，好鍾意畫畫嘅兩兄弟表示好想參加❤️

現場有美術老師指導佢哋點樣去創作一幅圖畫，所以決定俾佢哋試吓，開頭兩兄弟都好認真畫，但係去到尾聲嘅時候佢哋就跑咗去兒童玩樂區玩，變咗我同爸爸喺度畫😆

（突然間變咗好似我哋既拍拖活動咁）完成畫作之後仲可以即場製成燙畫 T-Shirt㗎！

真係好特別又有好有紀念價值！以後兩兄弟又多咗一件兄弟裝啦！😍

今次兩日一夜嘅挪亞方舟之旅我哋一家都玩得好開心，好滿足！唯一美中不足係挪亞方舟公園因為疫情而關閉咗而少咗一啲景點，不過好彩酒店嘅套票都好貼心，包咗好多啱小朋友嘅活動。

仲有個好消息想同大家分享，挪亞方舟公園2月18日已經重開啦！希望我哋一家可以有機會再嚟多一次盡情暢玩啦！

更多預訂酒店資訊；

家庭樂繽紛主題套房住宿套票 (2月至3月)

https://www.noahsarkhotel.com.hk/hk/rooms/room_promotion_imgs_296_d_poster.html